Home Who We Be

Who We Be

Na Who We Be? Oya hear am…

TalkHealth9ja na the first, one and only news tori channel wey dey use countryman langage – Pidgin English –  to break down informate and educate Naija people about health (a.k.a bodi matter. As e be say na big big oyinbo grammar dem dey blow on top bodi matter things for inside hospital, radio, television, internet and even for newspaper stand sef; we dey break am down for country people make everybody fit understand how dem body go dey chim, kakaraka and kpoikally kpoi kpoi.

Since 2014, we don dey use different tori channel to spread the gospel of bodi matter, including radio, twitter, facebook, instagram and blog. We go soon enter YouTube sef. Our week-by-week radio show dey hold every Friday for 99.5 Wazobia FM Abuja. Before before, the show bin dey happen for 45 minutes (9.15am – 10.00am) on top Una Wake Up Show with Bigmo. But as the show dey sweet like honey and country people begin ask for more, your kajad Wazobia FM don increase the time to one hour (1.00pm – 2.00pm), then move am to Oga Madam Office with the daughter of Holy Ghost – Willy Willy and ominiknowest – MC Bluetooth. We dey talk any kind bodi matter issue plus including disease prevention, health law dem, and how everybody health go take dey gidigba.

The main persons wey dey for our back na the Okosisi 1 and Ogidigborigbo 1 of Bodi Matter himself – DonLaz and the biggest radio person for inside Abuja – BigmoNaija. Na Talk Health Real Media Limited get us o. And we dey join body with other people and company dem to bring better health tori come your domot.