As part of series of di Media Epidemiology Infodemiology and Social and Behavior Change Risk Communication Fellowship for group one, organised by National Centre for Disease Control and Prevention (NCDC) with support from Breakthrough-Action Nigeria, United States Agency for International Development, plus di African Field Epidemiology Network (AFENET),a six-day training tagged “track one : Basic Epidemiology” don begin for di thirty (30) journalists.
Di training wey dey happen for AFENET Office, Abuja Nigeria, bring together journalists, body matter sabinus, and government officials from di NCDC,African Centre for Disease Control Federal Ministry of Agriculture and Food Security, Federal Ministry of Environment to yan di important wey ogbonge report as e take concern health dey for media
Di oga kpata kapata for National Centre for Disease Control and Prevention (NCDC), Dr.Ifedayo Adetifa for him opening remark, emphasized di role wey di media get to take shape how di public dey see and understand health issues.
“In health generally, e dey very very important say di public trust all di places wey dem dey get informate from as e go helep dem believe wetin dem dey hear from di media, body matter sabinus, government plus non governmental organisations”.
Dr. Adetifa come draw di participants attention to how important correct report dey as e take concern public awareness and how people dey take make decision wey concern healthcare services plus di need make media and health sector dey work togeda for correct informate to dey reach people.
“E dey very good to sabi run like Usain Bolt but wetin dey more importanta na to dey komot ogbonge informate becos any jaga jaga informate fit cause plenty wahala, him add.
For her address, Dr. Ndadlilnasiya Endie Wazir, wey be di representative of di regional coordinator of AFENET talk say di program na ogbonge opportunity for journalists to take become sabi people for public health matters and to take sabi how to dey tell correct tori to di public.
” E dey very important to train di media on epidemiology, how to communicate betta when plenty people begin dey sick at di same time plus di correct thing to talk and when e good make to kukuma close mouth. We dey hope say as we dey train una so, we go see plenty changes as e concern health reporting.”
Also, Mr. Ahaziah Abubakar Suleiman, wey represent di Broadcasting Organisation of Nigeria tell participants say dem select dem from plenty plenty other people wey bin apply for di fellowship from different part of Nigeria so make dem dey put their mind inside make dem fit make betta change for di health sector and health reporting.
“Dis Fellowship na di first kain around di world ,take am very serious. One of di advantage of dis programme be say una go become poll of reporters and producers wey go join body togeda to dey check correct informate wey concern health“.
Him come carry plenty tuale sama di organizers for selecting seventeen broadcasters from BON out of di thirty journalists, Mr. Ahahzia say na BON be di koko beneficiaries of di Fellowship.
Mrs. Ojoma Akor wey di elected governor of di Fellowship follow thank di organisers of di program and promise dem say dem go use dis opportunity to take betta di state of health and health reporting for naija..
Di Media EIS Fellowship go serve as platform where media plus health experts as e go provide journalists with knowledge and skills to take dey report health matter