WHO, di ogbonge bodi mata organisation for obodo world don yan say about 91 million African pipo dey live with Hepatitis , follow by close to 125,000 deaths wey di sickness dey cos.
Na di Africa regional director. Dr. Matshidiso Moeti yan dis one on Friday when she dey give her message as obodo world mark International Hepatitis Day 2023, “One Life, One Liver”.
She talk say dem find out say1.2 million pipo get hepatitis for 2019 alone and plenty young pipo dey die from di sickness.
Hepatitis na sickness wey virus dey cause and e dey affect the liver, e dey cause inflammation and e dey lead to more serious bodi mata issue like liver cirrhosis and liver cancer. Di one wey common pass for Africa na hepatitis B and C, and peson fit get am when dem no use condom dey knack, blood wey don contaminate with di sickness plus from mama to pikin.
WHO yan say dem dey gada plenty muscle to see say dem pursue hepatitis komot for Obodo world by 2030, dem com follow yan say for it to dey possible, pipo nid get di koko informate wey go helep protect dem from di disease, and make dem try dey go for hepatitis test plus vaccination.