One public health expert, Dr. Toluwani Binutu, don warn people make dem no dey use toothpaste wey dey white teeth too much.
Di physician tok say if people use that kain toothpaste too much, the teeth go change color to yellow.
He tok say di stains fit come from anything wey we dey chop or drink and that people wey dey drink coffee too much plus people wey dey smoke fit get teeth stain.
On top the toothpaste mata, he tok say na because the toothpaste wey dey white teeth dey very sharp naim make am dey comot stains more than normal toothpaste.
But e come warn say the toothpaste wey dey white teeth dey work like sandpaper and na there di problem dey because as you dey use am too much, e no dey just comot stains, e go start to dey comot di cover (enamel) of di teeth wey white, come leave the inside wey yellow pass the cover.
Di expert come advise say even if person must use the toothpaste wey dey white, make him no use am too much, make e be once once and if really di person wan white him teeth, make him visit beta dentist make dem do professional work for am.