E be like say Naija people dey O.Y.O – on your own as Presido Buhari don port enter London for medical checkup even as doctors and other health workers dey cry over non-payment of dem salary. According by di message wey Presido Media Adviser, Mr. Femi Adesina komot yesterday, Oga Buhari go dey 2 weeks for London dey torchlight im bodi and make himsef kajad.
As things be so, di presido of di National Association of Resident Doctors (NARD), Dr Uyilawa Okhuaihesuyi squeeze face talk say no going back on di no-work strike wey im members all over Naija go start from Thursday 1st April 2021. He tell our tori pesin say plenty doctors for different federal hospitals never get salary alert since this year, and some unpaid allowee since last year sef. He also talk say ogbonge government don break di gentleman agreement dem sign last year. He say as things be, e show say ogbonge government no serious at all and dem no wan make hospitals work again for we kontri.
You remember dis tori “We See Danger! Yawa fit ghast for Naija Health Sector Soon – Resident Doctors”, e be like say e don dey happen o. We go bring you different aspects of di tori.
