Naija Presidency don announce say them don pay N4,642,485,146.00 (4.642 billion Naira) as hazard allawee to body-mata workers.
This tori wey dey burst brain, come through the official verified twitter handle of Naija presidency on Sunday.
The money wey them pay na for 55,031 body-mata workers for 35 Covid19 hospital and medical centers for across Naija. Them still dey arrange more money to pay people wey never see alert.
Na like this them take pay the hazard allawee:
50% of Consolidated Basic Salary to all workers wey dey Covid19 designated Hospitals and Centers.
40% of Consolidated Basic Salary to body-mata workers wey no dey Covid19 designated Hospitals and Centers.
10% of Consolidated Basic Salary to people wey no be body-mata workers but be professionals for Covid19 centers.
20% of Consolidated Basic Salary as special allowee to body-mata workers wey dey manage Covid-19 patients Treatment and Isolation Centres directly.
