The assistant Editor TalkHealth9ja Real Media Limited, Omotosho Adedayo don say e possible make preventable deaths from diseases kill people pass Coro inside this pandemic.
Him use Naija as example, aids in form of drugs, equipments, and other stuffs wey dey come from Obodo Oyibo don reduce, because every country dey rub wey dey pain them for body right now.
As e be now, most parts of the country dey depend ontop supplies wey still dey available, but wetin go happen when these supplies finish? Aeroplane no dey fly come from Obodo Oyibo like normal, even interstate movement no dey.
Wetin be the implications? People wey get symptoms wey look like Coro, go dey fear to go hospital, people dey fear hospitals generally sev, Patients wey need care for other states no fit access the care now because of restriction of movement, vaccination of polio, meningitis and the rest go soon become challenge too.
UNICEF been complain recently sev say the pandemic don slow down their efforts to combat body-mata issues, due to restriction of movements.
Na where we wan go from here? E don tey wey Naija body-mata sector don dey suffer and government no gree put eye inside the matter, as e be now Naija no get capacity to produce most of the things wey we need to run any of our sectors.
