Pregnant Coro patient don born baby boy inside Lagos state. Press statement wey the state government drop, say, the patient born pikin through Caesarean section (C-S) for Gbagada isolation center inside Lagos state, mama and pikin dey alright.
The governor of Lagos state, Babajide Sanwoolu sev announce say them don discharge 67 patients from isolation centers inside Lagos.
For inside the 67 wey them discharge, 22 na women, 45 na men, including 3 Oyibo people, inside the Oyibo people na; 2 Indian people and 1 Chinese person.
Out of the 67 patients wey them discharge; 24 na from the Mainland Infectious Disease Hospital, Yaba, 22 na from Onikan, 11 na from Agidingbi, two na from Lekki and eight na from Lagos University Teaching Hospital Isolation Centres.
The total number of people wey them don discharge from Lagos now na 608.