The Founder of DAAR Communications, owners of African Independent Television AIT, Raypower100.5 FM, DAAR Sat, High Chief Raymond Dokpesi, don dey alright and them don discharge am from Gwagwalada isolation center inside FCT.
For video wey show face online, DAAR Communications workers been welcome their oga, with jollyfication. Dokpesi sev been yan some tori wey go make guyman head think wella.
Chief Dokpesi say, as him enter isolation center, him no understand how the paroz for isolation centers dey go, because na like malaria medicine them dey give people for there.
Him come say, the symptoms wey people dey show sev na malaria symptoms, matter no end there o, him come say some people been do tests for janded laboratories inside Abuja and all the results come out as Malaria, Malaria.
Dokpesi end the matter with the fact say, him never still understand the relationship or difference between Malaria and Corona.
