This small tiny Coronavirus wey dey cause jerking of mind for obodo Naija na new type of the virus o. Join-bodi for bodi-mata for obodo world (WHO) name am Covid-19 and e don show face for more than 50 countries plus obodo Naija sef where e land like James Bond yesterday.
How you fit suspect pesin wey get am?
- The body go dey hot, temperature go pass 37.5 degrees Celsius.
- Cough go dey and the pesin no go dey cough out anything.
- Headache follow sef
- Muscle pains fit dey
- Tiredness go dey
- Breathing go dey fast and short when the virus don enter next level inside the host body
Abeg, check the photo wey dey top to see if e remain.
No forget say ogbonge government don beg us say make we shine eyes but no panic. The Oga for NCDC sef, Dr. Chikwe Ihekweazu don kneel down beg Naija people make dem no spread fake news on top the virus. He promise say he and his team no go sleep until dem pursue the vrius komot for obodo Naija.
