E never tey wey Lagos state get confirmed case of Lassa Fever, The state commissioner for health, Prof. Akin Abayomi been give update about the situation, on Wednesday, for press briefing wey happen inside Lagos state, Nigeria.
Him say the confirmed case wey them get na one man wey come from Ebonyi, come do program for Law School, him body never dey alright for some time now, him go Law School clinic, them treat Malaria, body no still tanda, them refer am to Nigerian Air Force Clini wey dey Onikan, Lagos, na there them come say make him go LUTH. Na after them treat our guyman for LUTH, them con suspect say na Lassa fever as him no respond to standard Malaria and Typhoid treatments.
On Feb. 17 naim them confirm say na Lassa Fever the guy get, them transfer am go Isolation Containment Facility for LUTH immediately. Them come do contact tracing, them discover say him don get contact with 63 people since him enter Lagos, people from Law School, Nigerian Air Force Clinic and LUTH, say them go locate these people and isolate them for tests and treatments too, so that them go fit reduce the spread of Lassa Fever for inside the state.