One businessman from Awka South Local Government Area of Anambra, wey him wife just born four pikins (quadruplets) dey beg Gov. Willie Obiano and him Wife for assistance to save the lives of him children.
Mr. Christopher Okoye-Ifemma, 54, tell News Agency of Nigeria (NAN) inside Awka, say the hospital management don tell am say him need N 1.5 million to keep each of him children alive as some of them dey life support machine already.
Okoye-Ifemma say the babies make him and him wife jolly after waiting for 13 years without pikin, but to keep them alive na serious wahala. Him wife born the quadruplets, three boys and one girl on Sept. 25, through Cesarean Section (operation or CS) for ObiJackson Women and Children Hospital inside Okija. These children don dey incubators since, because na 7 months them do inside their mama belle, two dey on life support, the other two dey stable.
So far, him don spend over N 700,000. To be specific, him pay the hospital N 480,000 for drugs and hospital services and about N 200,000 for other bills.
On Monday, one of the children on life support kpai, the remaining three dey critical condition. The hospital management don say if him no drop better bar by weekend, them go remove the children from the incubator.
The money too much for am, na why him dey beg Gov. Willie Obiano and his wife, the Commissioner for Health and well-meaning individuals to help them.