The fight against HIV/AIDS na matta wey concern everybody and all the countries for the world. As we nor go fit say make people wey get this virus die, we suppose try make life dey easy for them to live and reduce the spread of this virus.
As the fight against HIV/AIDS dey go, the National Agency for the Control of Aids (NACA) say them wan set up six new zonal offices, to fit help them tackle HIV/AIDS bumper to bumper.
NACA Director General Dr Gambo Aliyu, talk am for Abuja, say the new zonal offices go help the Agency coordinate the fight against HIV/AIDS.
The DG talk say Naija follow gum body with countries for the whole world to work to meet the 2030 global deadline to eradicate HIV/AIDS, him say if them continue to ginger like this, Naija go finish HIV/AIDS before the deadline sev.
