Life sweet, but when money enter life naim life dey sweet pass. Sickness no be anybody friend, but when you get money choke, you fit go anywhere go pay for any treatment.
The Deputy Chairman, Senate Committee on Defence, and Senator wey dey represent Plateau North, Istifanus Dung Gyang, when him visit Jos University Teaching Hospital (JUTH), say na the big men wey dey go obodo oyinbo for treatment naim dey kill Naija health care system. Him talk say the politicians and the people wey dey power no gree do anything about Naija healthcare because, them get money wey fit carry them go any country around the world for treatment.
Naija people, if you get money no mean say you better pass people wey no get, e go better make we use our position and money make life better for everybody. If health emergency dey, big man fit kpai before e go reach obodo oyinbo.