Ogbonge govt don reduce di budget for Basic Health Care Provision Fund from N44.4b to N25.5b; dis one mean say almost N19b don komot bodi from di original budget. Dis one follow for di second look paper wey Presido Buhari send give lawmakers for National Assembly on top 2020 budget.
Inside same paper, ogbonge government approve N27 billion for di renovation of di National Assembly building and also komot N60 billion from Universal Basic Education money.
NCDC don confam Covid-19 for di body of 11,166 people inside Naija by 3rd June, dem don discharge 3,329 and 315 people don kpai. Dis one mean say Naija don dey carry 3rd position for Coro inside Africa.
Since dis tori show face for public, plenty kontri people and NGOs don dey paravex on top di mata for inside social media. Dem say dis action show say health of Naija people no too mata for dis government. We go give you more tori about how kontri people dey react about dis mata.