Vexation don rise for we country about the plan of Ogbonge Government to bring chinko doctors to come follow fight Coro for Naija. The join-bodi of medical doctors wey be Nigeria Medical Association (NMA) don komot 2-page statement today signed by dia Presido, Dr Francis Faduyile wey dem distribute to tori people including TalkHealth9ja. Dem say make ogbonge government no try am o, in fact if na joke make dem stop am.
NMA talk say dem receive the tori of bringing chinko doctors wey Oga Minister of Bodi-mata, Dr Osagie Ehanire bin talk last Friday with heavy vex and annoyance. In short, dem say na big insult and embarrassment wey e be to all Naija doctors, nurses, lab scientists, pharmacists, and other health workers wey dey jinja hard to pursue Coro komot for obodo Naija. Dem give tuale and gbosas to doctors and health workers for inside Naija Centre for Disease Control (NCDC) for their better work wey don bring the hailing of World Health Organisation and United Nations.
See the full statement as NMA take write am. Warning, na grammar full inside am o.